logo vvv rwbVerslag Klootschieten 2016

De slag um de Gulden Kloot

deur Jan Koudehandjes

Klootschieten op de waarmste 25ste september ooit, is toch wel hiel biezunder. Waor bij veurige edities de dikke jas wel iens oet daon weur um beter te kunnen gooien, now was een T-shirtie haost al waarm genog. En dan kan de veurzitter wel zeggen dat ze zuks weer besteld hadden en dat het op tied leverd was, ie moet het geluk wel hebben. Of- en dat kan ok maor zo – stelt dizze waarmte oes nog veur hiel aandere problemen. Wel zal het zeggen.

Vief jaor leden hef de VvV het klootschieten veur de leste keer organiseerd en ze waren slim beneid of der nog belangstelling genog was. Zo as aait tegenwoordig kwam ok now de opgave slecht op gang. De eersten zult de lesten wezen. Oeteindelijk hebt 27 dielnimmers met andaon. Verdield over zes groepen weur een route van ongeveer vief kilometer oflegd.

20160925 klootschieten 001

Het was een mooie wedstried en der weur fanatiek streden. Af en toe de kloot eem zuken in het hoge gras, maor alle kloten kunnen weer inleverd worden. Ien anekdote wul ik je nog metgeven. De eerste ploeg was - bij wat wij de viefsprong nuumt – de kloot kwiet. Een vrouwspersoon van middelbaore leeftied komt oet het staotsbos fietsen, richting Elperweg. Het zöt daor in de barm ien op de knieën en met de haanden deur het gras hen gaon. Um dit te verklaoren zeg de zuker: “Ik bin mien kloot kwiet.” Hierop begunt de fietster te gieren van het lachen, waorbij zij nog maor net op de fiets blef zitten. “Ie mugt mij wel even helpen zuken.” Dat leste döt heur bijnao de das um. Het woord “kloot” bringt kennelijk nogal wat teweeg. En je zult der maor zunder zitten, dan kuj dit spel ja hiel niet speulen......

Halverwege har ’t bestuur een koffie/thee/ranja met koek stop. Net op tied, want het was döstig weer. Op een daolders plekkie was het goed toeven. Even wieder gungen de gedaachten al weer oet naor de borrel na ofloop, dus op naor de kroeg.

20160925 klootschieten 002

In een mooie grote kring op het terras, drinkerij en happies, wat wul een mens nog meer. Now ja, de oetslag weten vanzölf. Elk har de eerste pries, een gezellige middag. In het aantal wörpen meuk het niet iens zo veul. Het team met het mienste aantal had 137 keer gooien neudig en de eerste pries 102. Bij dit alles mot dan wel zegt worden dat het team dat as – op vief punten nao – lestes worden was, een gemiddelde leeftied van rond de tachtig had. Een terecht applaus was hun diel.

Het was een hiel gezellige middag. De dielnimmers, CR Hofsteenge en vrijwilligers wordt bedankt veur heur inzet. Tot een aander maol!